Yangi saroy qurilishi 1895-yil 14-avgustda amir Sayyid Abdulahadxon buyrug‘i bilan Yangi Buxoroda boshlanib, 1898-yilda tugallangan. Saroyning loyihachisi Aleksey Leontevich Benua bo‘lib, qurilishga muhandis Dubrovin rahbarlik qilgan, binoni buxorolik va rus ustalari qurgan va pardozlagan.
Ko‘plab minoralar, gumbazlar va ustunlarga ega saroy eklektik bo‘lib, barokko va ampir bilan birgalikda neo-mavritan uslubida qurilgan. Odatdagi yevropacha uslubdan tashqari, bezaklarda arabcha motivlardan ham foydalanilgan.
Saroyning qurilish maqsadi haqida turli xil versiyalar mavjud. Ulardan biriga ko‘ra, amir saroyni shaxsan o‘zi uchun qurishni buyurgan, biroq qurilish tugagandan so‘ng binoni ko‘zdan kechirib, uni yetarlicha muhtasham va hashamatli emas deb hisoblagan. Boshqa versiyaga ko‘ra, saroy qurilishi dastlab imperator Nikolay II ning Buxoro amirligiga tashrifi uchun rejalashtirilgan.
Sayyid Abdulahadxon vafotidan so‘ng uning vorisi amir Sayyid Olimxon temir yo‘l vokzali yaqinida joylashgan saroydan Buxoroga kelgan yuqori martabali shaxslar uchun qarorgoh sifatida foydalana boshladi.