Registon maydoni Samarqandning eng diqqatga sazovor tarixiy maskanidir. Uning tarixi Mirzo Ulug‘bek, Ali Qushchi, Qozizoda Rumiy, Alisher Navoiy, Abdurahmon Jomiy, Zahiriddin Bobur, Yalangto‘sh Bahodir va boshqa buyuk shaxslar nomi bilan bog‘liq. Hozirgi kunda Registon majmuasida uchta madrasa (Ulug‘bek, Tillakori va Sherdor) mavjud. Dastlab Ulug‘bek madrasasi (1417-20), so‘ngra qarama-qarshi tomondan Ulug‘bek xonaqohi (1424), shimolda Mirzoyi karvonsaroyi, janubda Alika Ko‘kaldosh jome masjidi (1430), uning yonida Muqatta’ masjidi va Abu Sa’id madrasasi qurilgan. XV asrning 20-40-yillarida
Registon muhtasham me’moriy ansamblga aylandi. XVII asrda Samarqand hokimi Yalangto‘sh Bahodir Ulug‘bekning vayron bo‘lgan xonaqohi o‘rnida Sherdor (1619-1635/36) madrasasini, Mirzoyi karvonsaroyi o‘rnida Tillakori (1646/47-1659/60) madrasasini qurdirgan.
Markaziy Osiyoda shaharlarning asosiy maydonlari an’anaviy ravishda Registon, ya’ni "qumli" deb atalgan.